Nú standa yfir klifurnámskeið fyrir börn í 3. og 4. bekk Grunnskólans á Ísafirði. Á námskeiðinu kynnast börnin klifrinu og hafa komist að því að það er mjög skemmtilegt og góð hreyfing. Orkuboltar fá mikla útrás og það reynir á nýja og óvænta þætti, líkamlega sem andlega.
Námskeiðin fara fram í gamla skátaheimilinu að Mjallargötu 4, þar sem Klifurfélag Vestfjarða er að byggja upp aðstöðu. Námskeiðin eru samstarfsverkefni klifurfélagsins og HSV.
Stefnt er á að halda fleiri námskeið því áhuginn er mikill. Nokkur dæmi eru um að börn sem ekki hafa fundið sig í hefðbundnum hópíþróttum, sýni mikinn áhuga á klifrinu. Það gleður mjög, gaman að geta boðið upp á nýjan valkost.
Vissir þú að inniklifur er nú Ólympíuíþrótt?
Hér að neðan má sjá myndir af stelpuhópnum að klifra og leysa þrautir.
Viltu styrkja félagið? Hægt er að senda póst á info@klifra.is og finna reikningsupplýsingar á forsíðu.
