Að tilefni íþróttaviku Evrópu verður Klifurfélag Vestfjarða með opið hús í inniklifuraðstöðunni að Mjallargötu 4, dagana 28. og 29. september nk., milli klukkan 15 og 18.

Á þessum tíma eru allir velkomnir að kíkja við og prófa að klifra eða bara skoða aðstöðuna og forvitnast. Það verða leiðbeinendur á staðnum. Eitthvað er til af klifurskóm sem hægt er að fá lánaða, en einnig má koma með hreina inniíþróttaskó til að klifra í. Gott ef þeir eru ekki mjög mjúkir.

Inniklifuraðstaðan er enn í uppbyggingu og mun verða farið í næsta skref mjög bráðlega. Meðan á því stendur verður minna hægt að nýta aðstöðuna og því tilvalið að kíkja við þarna í lok september á opnu dögunum og sjá hvað þegar er komið. Svo eftir smá hlé mun verða boðið upp á opna tíma reglulega.

Hlökkum til að sjá ykkur.